మానుకోట న్యూస్: లాసెట్‌లో మ‌న మానుకోట కుర్రాడు మెరిశాడు. కారంపూడి అరుణ్ కుమార్‌ ఐదేళ్ల లాసెట్‌లో రాష్ట్రవ్యాప్తంగా రెండో ర్యాంకు సాధించాడు. 120 మార్కుల‌కు గాను అత‌డు 97 మార్కులు సాధించాడు. అరుణ్‌కుమార్ స్వ‌స్థ‌లం మరిపెడ మండ‌ల కేంద్రం. అత‌డి తండ్రి ఉపేంద‌ర్ టైల‌రింగ్ చేస్తున్నారు. స్థానిక మోడ‌ల్ స్కూల్‌లో ఇటీవ‌ల సీఈసీ గ్రూప్‌లో ఇంట‌ర్మీడియ‌ట్ పూర్తిచేశాడు అరుణ్‌కుమార్. న్యాయ వృత్తితో మీద ఆస‌క్తితో ఐదేళ్ల లాసెట్ రాశాడు. “న్యాయ వృత్తి అంటే నాకు చాలా ఇష్టం. ఐదేళ్ల లా కోర్సును పూర్తి చేసిన త‌ర్వాత సివిల్స్‌కు సిద్ద‌మ‌వుతా.” అని అరుణ్‌కుమార్ “మానుకోట న్యూస్”తో చెప్పారు. కాగా, ఐదేళ్ల లాసెట్‌లో క‌రీంన‌గ‌ర్ జిల్లాకు చెందిన శ్రీనివాస‌కృష్ణ 98 మార్కుల‌తో మొద‌టి ర్యాంకు సాధించాడు.
